உள்ளூராட்சி சபைத் தேர்தல் தாமதமாவதற்கு தானே காரணமென ஒருசில தரப்புகளிலிருந்து வெளிவரும் குற்றச்சாட்டுகளை ஏற்றுக்கொள்ள முடியாது எனவும், அத்தேர்தலைத் தாமதிக்கவேண்டுமென்ற நோக்கமோ நிர்ப்பந்தமோ தனக்குக் கிடையாது எனவும் மாகாண சபைகள் மற்றும் உள்ளூராட்சி சபைகள் அமைச்சர் பைசர் முஸ்தபா தெரிவித்துள்ளார்.
இது தொடர்பில் சிங்கள ஊடகம் ஒன்றுக்கு அவர் மேலும் கூறியுள்ளதாவது:-
“தேர்தல் தாமதமாவதற்குத் நானே காரணம் என்பதால் எனக்கு எதிராக நம்பிக்கையில்லாப் பிரேரணையொன்றைக் கொண்டுவர ஒருசிலர் முயற்சிசெய்து வருகின்றபோதிலும் அந்தப் பிரேரணைக்கு நான் ஒருபோதும் அஞ்சப் போவதில்லை.
எல்லை நிர்ணய விவகாரத்தாலேயே உள்ளூராட்சி சபைத் தேர்தல் ஒத்திவைக்கப்பட்டு வந்திருக்கின்றது.
உள்ளூராட்சி சபைத் தேர்தல் சட்டத்தின் திருத்தப் பிரேரணை அடுத்த வாரத்தில் நாடாளுமன்றத்தில் சமர்ப்பிக்கப்படவுள்ளது. அதன்பின்னரே இறுதி முடிவெடுக்க முடியும்” – என்று தெரிவித்துள்ளார்.
