மேற்குவங்க முதல்வர் மம்தா – அறிவுரை தேவையில்லை, தேவையான நிதியை வழங்குங்கள்

அறிவுரை தேவையில்லை, தேவையான நிதியை வழங்குங்கள் – மேற்குவங்க முதல்வர் மம்தா

மாநில அரசின் வளர்ச்சித் திட்டங்கள் குறித்து அறிவுரை தருவதை விடுத்து, அதற்குத் தேவையான நிதியை வழங்க மத்திய அரசு நடவடிக்கை எடுக்க வேண்டும் என மேற்குவங்க முதல்வர் மம்தா பானர்ஜி தெரிவித்தார்.

வாய் ஜாலம் வேண்டாம்:

கோல்கட்டாவில் நடந்த கிராமப் பஞ்சாயத்து சம்மேளனக் கூட்டத்தில் கலந்து கொண்டு அவர் பேசியதாவது: ரூபாய் நோட்டு வாபஸ் நடவடிக்கையால் கிராமப்புறங்களில் கடும் பாதிப்புகள் ஏற்பட்டுள்ளது. இதனை சமாளிக்க ஏராளமான நிதி தேவைப்படுகிறது. ஆனால், வளர்ச்சிப் பணிகளுக்கு மத்திய அரசு நிதி வழங்குவதில்லை. வளர்ச்சி திட்டங்களை செயல்படுத்தும்படி, மாநில அரசுகளுக்கு மத்திய அரசு அறிவுரை கூறி வருகிறது; அதற்கு தேவையான நிதியை, முதலில் ஒதுக்க வேண்டும்.

செயலில் வேகம்:

வாய் ஜாலம் காட்டுவதை விட, செயலில் வேகம் காட்டுவதையே நாங்கள் விரும்புகிறோம். கிராம பொருளாதார திட்டங்களை செயல்படுத்தி வருவது, மாநில அரசுகள் தான். மாநிலங்களில் மத, இனக் கலவரங்கள் ஏற்படுவதை எந்த சூழ்நிலையிலும் அனுமதிக்கக் கூடாது. இவ்வாறு அவர் தெரிவித்தார்.