சஹரானுடன் தொடர்புபட்ட அதிர்ச்சி தகவல்

தீவிரவாதி சஹ்ரானுடன் ஆயுதப்பயிற்சி பெற்ற 16 வயதுடைய சிறுவன் ஒருவன் அம்பாறை பகுதியில் வைத்து கைது செய்யப்பட்ட நிலையில், குறித்த சிறுவன் வாக்குமூலம் வழங்கியுள்ளார்.

இதன்போது குறித்த சிறுவன் பல முக்கிய தகவல்களை வழங்கியுள்ளதாக பொலிஸ் ஊடக பேச்சாளர் தெரிவித்துள்ளார்.

கெக்குணுகொல்ல பகுதியை சேர்ந்த முஹம்மத் நௌபர் அப்துல்லா எனும் சிறுவனே கைது செய்யப்பட்டிருந்தார்.

கைது செய்யப்பட்ட சிறுவன் தேசிய தௌஹீத் ஜமாத் இயக்கத்தின் இரண்டாவது தலைவரான நௌவர் மௌலவியின் மகன் என தெரிவிக்கப்படுகின்றது.

தன்னுடைய தந்தை சுற்றுலாவிற்காக தன்னை நுவரெலியாவிற்கு அழைத்துச் சென்றபோது அங்குள்ள வீடு ஒன்றில் தங்கியிருந்ததகவும், குறித்த வீட்டிற்கு செல்லும்போது அங்கு 4 அல்லது 5 மௌலவிகள் இருந்த நிலையில் , அதன்பின்னர் இரவு 28 அல்லது 30 பேர் வரை அங்கு வந்ததாகவும் அன்றிரவு அங்கு உறங்கியதாவும் சிறுவன் தெரிவித்துள்ளார்.

மறு நாள் காலை பிரசங்கம் ஆரம்பமானதும் இரு தினங்கள் பூராகவும் பிரசங்கம் இடம்பெற்றதாகவும், அதன்போது குறித்த பிரசங்கங்களில் ஜிஹாதின் முக்கியத்துவம் தொடர்பில் பல்வேறு கருத்துக்கள் தெரிவிக்கப்பட்டதாகவும் அவர் குறிப்பிட்டுள்ளார்.

இதன்போது பெரிய துப்பாக்கி ஒன்று மற்றும் சிறிய துப்பாக்கி ஒன்றையும் காட்டியதோடு, வெடிபொருள் தயாரிக்கும் விதம் தொடர்பிலும் விளக்கம் அளிக்கப்பட்டதாகவும் சிறுவன் தெரிவித்துள்ளார்.

பின்னர் அனைவரும் சத்தியப்பிரமாணம் செய்து ஒவ்வொருவருக்கும் பெயர் வைக்கப்பட்டதாகவும், அந்த வகையில், தனக்கு அபூஹசம் என பெயர் இடப்பட்டதாகவும் சிறுவன் கூறியுள்ளார்.

அத்துடன் சஹ்ரான் மௌலவியின் முன்னால் தாம் அனைவரும் சத்தியப்பிரமாணம் செய்து கொண்ட கூறிய சிறுவன், அவ்வாறு சத்தியப்பிரமாணம் செய்து கொண்ட பின்னரே தங்களுக்கு ஆயுதப்பயிற்சி வழங்கப்பட்டதாகவும் வாக்குமூலம் வழங்கியதாக பொலிஸ் ஊடக பேச்சாளர் தெரிவித்துள்ளமை குறிப்பிடத்தக்கது.