டெல்லி உலக கோப்பை துப்பாக்கி சுடுதல் போட்டி – இந்தியா வெண்கலப்பதக்கம்

டெல்லி உலக கோப்பை துப்பாக்கி சுடுதல் போட்டி – இந்தியா வெண்கலப்பதக்கம்

டெல்லியில் நடந்து வரும் உலக கோப்பை துப்பாக்கி சுடுதல் போட்டியில் இந்தியாவுக்கு இதுவரை ஒரே ஒரு வெண்கலப்பதக்கம் மட்டுமே கிடைத்துள்ளது.

உலக கோப்பை துப்பாக்கி சுடுதல் போட்டி டெல்லியில் நடந்து வருகிறது. இதில் நேற்றைய நாளில் இந்தியாவுக்கு ஏமாற்றமே மிஞ்சியது. ஆண்களுக்கான 50 மீட்டர் ரைபிள் மூன்று நிலை பிரிவில் இந்திய வீரர் சஞ்ஜீவ் ராஜ்பூத் தகுதி சுற்றில் 1159 புள்ளிகள் குவித்து 8 பேரில் ஒருவராக இறுதிசுற்றை எட்டினார்.

ஆனால் இறுதிப்போட்டியில் பதக்க வாய்ப்பை இழந்து 5-வது இடமே பிடிக்க முடிந்தது. மற்ற இந்தியர்கள் செயின் சிங் 9-வது இடத்துக்கும், சத்யேந்திர சிங் 13-வது இடத்துக்கும் தள்ளப்பட்டனர். பெண்களுக்கான 10 மீட்டர் ஏர் பிஸ்டல் பிரிவில் முன்னாள் நம்பர் ஒன் வீராங்கனை இந்தியாவின் ஹீனா சித்து தகுதி சுற்றோடு வெளியேறினார். 0.1 புள்ளி வித்தியாசத்தில் இறுதிசுற்று வாய்ப்பை இழந்த அவர் 11-வது இடத்துக்கு பின்தங்கினார்.

பதக்கப்பட்டியலில் சீனா முதலிடம் (5 தங்கம், 4 வெள்ளி) வகிக்கிறது. இந்தியாவுக்கு இதுவரை ஒரே ஒரு வெண்கலப்பதக்கம் மட்டுமே கிடைத்துள்ளது.